Mini Grants ແມ່ນຫຍັງ?
ສິ່ງທັງໝົດທີ່ຕ້ອງການ ກໍແມ່ນ ການມີແນວຄວາມຄິດທີ່ຊົງພະລັງ.ບໍ່ຈຳເປັນວ່າທຸກການກະທຳຕ້ອງຍິ່ງໃຫຍ່ ເພື່ອສ້າງຜົນກະທົບຕໍ່ສະພາບດິນຟ້າອາກາດຂອງພວກເຮົາ ແລະຊຸມຊົນຕ່າງໆ ຂອງພວກເຮົາ. PCEF Mini Grants (ທຶນຊ່ວຍເຫຼືອຂະໜາດນ້ອຍຂອງກອງທຶນ PCEF) ແມ່ນໂອກາດໃນການໃຫ້ທຶນປະຈຳໄຕມາດ ຊຶ່ງສະເໜີໃຫ້ສູງເຖິງ $5,000 ສຳລັບກິດຈະກຳຕ່າງໆ ທີ່ສອດຄ່ອງກັບເປົ້າໝາຍຂອງ PCEF ໃນການແກ້ໄຂບັນຫາການປ່ຽນແປງສະພາບດິນຟ້າອາກາດ ແລະການສົ່ງເສີມຄວາມເປັນທັມໃນດ້ານເຊື້ອຊາດ ແລະສັງຄົມ. Mini Grants (ທຶນຊ່ວຍເຫຼືອຂະໜາດນ້ອຍ) ນີ້ທີ່ສ້າງຂຶ້ນເພື່ອສະໜອງຕອບຕໍ່ຄວາມຄິດເຫັນຂອງຊຸມຊົນນັ້ນ ໃຫ້ໂອກາດແກ່ບັນດາອົງການຕ່າງໆ ໂດຍໃຫ້ທຶນສະໜັບສະໜູນແກ່ກິດຈະກຳ ທີ່ຫຼາກຫຼາຍ, ລວມເຖິງ ການຊ່ວຍເຫຼືອໃນການຂຽນໂຄງການຂໍທຶນຊ່ວຍເຫຼືອ, ໂຄງການຂະໜາດນ້ອຍຕ່າງໆ, ການຈັດງານກິດຈະກຳຕ່າງໆ, ແລະການຝຶກອົບຮົມ.
ອົງກອນທຸກຂະໜາດແມ່ນມີສິດທີ່ຈະສະໝັກ ໂດຍຈະໃຫ້ຄວາມສຳຄັນແລະການພິຈາລະນາກ່ອນ ແກ່ບັນດາອົງການຂະໜາດນ້ອຍ ທີ່ມາຈາກ ແລະນຳພາໂດຍຊຸມຊົນຜູ້ມີສິດພິເສດສຳລັບ PCEF.
ຈຸດປະສົງ
ການສະໝັກຂໍທຶນຊ່ວຍເຫຼືອແບບດັ້ງເດີມ ແລະຂັ້ນຕອນການຂໍທຶນນັ້ນແມ່ນເລື່ອງທ້າທາຍໃນການກຳນົດຫາທິດທາງ, ໂດຍສະເພາະແມ່ນ ສຳລັບບັນດາກຸ່ມ ຫຼື ອົງການຂະໜາດໜ້ອຍ. ອົງການທີ່ມີຂະໜາດນ້ອຍກວ່າ ຍັງອາດເຂົ້າເຖິງແຫຼ່ງທຶນຊ່ວຍເຫຼືອໄດ້ຢ່າງຈຳກັດອີກດ້ວຍ. PCEF Mini Grants ມີເປົ້າໝາຍທີ່ຈະຫຼຸດຜ່ອນບັນຫາອຸປະສັກສຳລັບບັນດາອົງການຕ່າງໆ ທີ່ເຮັດວຽກພົວພັນດ້ານສະພາບດິນຟ້າອາກາດ ແລະຄວາມເປັນທັມດ້ານເຊື້ອຊາດ ໂດຍການສະເໜີໂອກາດໃນການໃຫ້ທຶນປະຈຳໄຕມາດນີ້ ຊຶ່ງຕອບສະໜອງຕໍ່ຄວາມຕ້ອງການດ້ານເງິນທຶນຂະໜາດນ້ອຍ ແລະມີເງື່ອນໄຂດ້ານເວລາ ໂດຍຜ່ານການສະໝັກແບບງ່າຍໆ.
ຮຽນຮູ້ຕື່ມກ່ຽວກັບວ່າ ເປັນຫຍັງ PCEF ຈຶ່ງສະເໜີໂອກາດໃນການໃຫ້ທຶນ Mini Grants.
ຈຳນວນເງິນທຶນ
ໂຄງການທຶນຊ່ວຍເຫຼືອຂະໜາດນ້ອຍ ມີງົບປະມານປະຈຳປີລວມທັງໝົດ $400,000. ໂດຍໃຫ້ທຶນຈຳນວນ $100,000 ໃນແຕ່ລະໄຕມາດ. ຜູ້ສະໝັກສາມາດສະໝັກຂໍທຶນໄດ້ສູງສຸດເຖິງ $5,000 ຕໍ່ໄຕມາດ.
ຮຽນຮູ້ລາຍລະອຽດເພີ່ມເຕີມກ່ຽວກັບການໃຫ້ທຶນ ແລະຂໍ້ຈຳກັດໃນດ້ານການສະໝັກ.
ຮອບການໃຫ້ທຶນ ແລະກຳນົດເວລາສຳລັບການສະໝັກ
ໃນທຸກໄຕມາດ ຈະມີການພິຈາລະນາແລະໃຫ້ທຶນຊ່ວຍເຫຼືອຂະໜາດນ້ອຍ. ທ່ານສາມາດຍື່ນສົ່ງໃບສະໝັກໄດ້ຕະຫຼອດເວລາ ແລະໃບສະໝັກຂອງທ່ານຈະຖືກຈັດໃຫ້ຢູ່ໃນຮອບການໃຫ້ທຶນຮອບຕໍ່ໄປ. ຖ້າວ່າ ຜູ້ສະໝັກບໍ່ຖືກເລືອກສຳລັບຮອບທຶນໜຶ່ງ, ເຂົາເຈົ້າກໍມີທາງເລືອກໂດຍໃບສະໝັກຂອງເຂົາເຈົ້າຈະຖືກລວມໂດຍອັດຕະໂນມັດຢູ່ໃນການພິຈາລະນາທຶນຮອບຕໍ່ໄປ ໂດຍບໍ່ຕ້ອງສົ່ງໃບສະໝັກອີກ.
ກຳນົດວັນສຸດທ້າຍຂອງການສະໝັກ
- 1 ສິງຫາ 2021
- 1 ຕຸລາ 2021
- 1 ມົກຣາ 2022
- 1 ເມສາ 2022
ຄຸນສົມບັດ
- ສະເພາະອົງການບໍ່ສະແຫວງຫາຜົນກຳໄລ, ລວມເຖິງ ບັນດາຜູ້ສະໜັບສະໜູນທາງການເງິນ, ສາມາດສະໝັກໄດ້
- ໂຄງການຕ່າງໆ ທີ່ເປັນການປັບປຸງທາງທຳມະຊາດ ຕ້ອງໄດ້ເຮັດພາຍໃນເຂດເມືອງພອທແລນດ໌ ເພື່ອໃຫ້ເປັນປະໂຫຍດຕໍ່ບັນດາຜູ້ຢູ່ອາໄສຂອງເມືອງພອທແລນດ໌
- ໂຄງການຕ່າງໆ ທີ່ບໍ່ແມ່ນການປັບປຸງທາງທຳມະຊາດ ໃດໆ ຕ້ອງສ້າງປະໂຫຍດໃຫ້ແກ່ບັນດາຜູ້ຢູ່ອາໄສຂອງເມືອງພອທແລນດ໌
- ການຂໍທຶນຊ່ວຍເຫຼືອຕ້ອງເປັນການສົ່ງເສີມເປົ້າໝາຍຂອງ PCEF ໃນການແກ້ໄຂບັນຫາການປ່ຽນແປງສະພາບດິນຟ້າອາກາດ ແລະຄວາມເປັນທັມທາງເຊື້ອຊາດ ແລະສັງຄົມ (ເບິ່ງ ວັດຖຸປະສົງຂອງ PCEF ເພື່ອຮູ້ຂໍ້ມູນເພີ່ມເຕີມ)
- ອົງການຕ່າງໆ ສາມາດຍື່ນສົ່ງໃບສະໝັກຂໍທຶນຊ່ວຍເຫຼືອຂະໜາດນ້ອຍໄດ້ສູງສຸດ ໜຶ່ງ ທຶນຕໍ່ໜຶ່ງໄຕມາດ
- ການສະໝັກແຕ່ລະຄັ້ງຕ້ອງເປັນການຮ້ອງຂໍທີ່ມີລັກສະນະສະເພາະ
- ການຂໍທຶນບໍ່ສາມາດຂໍເພີ່ມ ໃຫ້ແກ່ໂຄງການອື່ນໆ ທີ່ໄດ້ຮັບທຶນສະໜັບສະໜູນຈາກ PCEF.
ຄ່າໃຊ້ຈ່າຍທີ່ມີສິດຕາມເງື່ອນໄຂ
ການຂໍທຶນທັງໝົດຕ້ອງເປັນການຂໍເພື່ອສະໜັບສະໜູນເປົ້າໝາຍຂອງ PCEF ໃນການແກ້ໄຂບັນຫາການປ່ຽນແປງສະພາບດິນຟ້າອາກາດ ແລະສົ່ງເສີມຄວາມເປັນທັມດ້ານເຊື້ອຊາດ ແລະສັງຄົມ. ຜູ້ສະໝັກຈະຕ້ອງບັນລະຍາຍກ່ຽວກັບການຂໍທຶນຂອງຕົນເອງ ໂດຍນຳໃຊ້ປະເພດເງິນທຶນຕໍ່ໄປນີ້.
- ການຊື້ສິ່ງຂອງ: ຕົວຢ່າງລວມມີ ສື່ສິ່ງພິມຕ່າງໆ, ອາຫານສຳລັບກິດຈະກຳ, ການຊື້ເຕັກໂນໂລຊີ, ການສະໝັກເວັບໄຊ, ເຄື່ອງມືເຮັດສວນ ແລະວັດສະດຸຕ່າງໆ, ເຄື່ອງມືຕ່າງໆ
- ເວລາເຮັດວຽກຂອງພະນັກງານ ແລະການມີສ່ວນຮ່ວມຂອງຊຸມຊົນ: ຕົວຢ່າງລວມມີ ການຈ່າຍຄ່າຕອບແທນໃຫ້ແກ່ພະນັກງານໃນການຂຽນໂຄງການຂໍທຶນ, ປະຕິບັດວຽກງານໃນຊຸມຊົນ, ງານກິດຈະກຳຊຸມຊົນ ແລະໂຄງການຕ່າງໆ, ການວາງແຜນໂຄງການ, ງານບໍລິຫານຈັດການ, ການພັດທະນາພາຍໃນອົງກອນ
- ຄ່າໃຊ້ຈ່າຍໃນການເຂົ້າຮ່ວມ ສຳລັບການຝຶກອົບຮົມ, ການປະຊຸມ, ແລະການສຶກສາ: ຕົວຢ່າງລວມມີ ການຈ່າຍຄ່າໃຊ້ຈ່າຍຕ່າງໆ ເພື່ອໃຫ້ພະນັກງານເຂົ້າຮ່ວມໃນການປະຊຸມທີ່ໃຫ້ຄວາມຮູ້, ການຝຶກອົບຮົມ, ງານກິດຈະກຳຕ່າງໆ, ແລະງານສຳມະນາ
- ການບໍລິການຕາມສັນຍາ: ຕົວຢ່າງລວມມີ ການຈ່າຍຄ່າບໍລິການຂຽນໂຄງການຂໍທຶນ, ຄ່າບໍລິການແປພາສາ ແລະນາຍພາສາ, ການຈັດປະຊຸມ, ຄ່າອອກແບບກຣາຟິກ, ຄ່າຈ້າງສິນລະປິນ/ນັກສະແດງ, ການຊ່ວຍເຫຼືອທາງເຕັກນິກ, ຄ່າປະເມີນຜົນ, ຄ່າກວດສອບພະລັງງານຕ່າງໆ
- ຄ່າໃຊ້ຈ່າຍທີ່ກ່ຽວຂ້ອງກັບຂໍ້ກຳນົດຂອງ PCEF:
- ຄ່າທຳນຽມການເປັນຜູ້ສະໜັບສະໜູນທາງການເງິນ: ບໍ່ເກີນ 10% ຂອງຈຳນວນເງິນທຶນທັງໝົດ
- ຄ່າໃຊ້ຈ່າຍດ້ານປະກັນໄພເພີ່ມເຕີມ: ຖ້າວ່າ ບໍລິສັດປະກັນໄພຂອງທ່ານຮຽກຮ້ອງເອົາຄ່າທຳນຽມໃນການຈັດຫາເອກະສານປະກັນໄພທີ່ຈຳເປັນ.
ຖ້າວ່າ ທ່ານບໍ່ແນ່ໃຈວ່າ ກິດຈະກຳທີ່ທ່ານຢາກເຮັດນັ້ນແມ່ນມີເງື່ອນໄຂເໝາະສົມສຳລັບທຶນຊ່ວຍເຫຼືອ Mini Grant ຫຼືບໍ່ນັ້ນ ຈົ່ງຕິດຕໍ່ PCEFminigrants@portlandoregon.gov.
ຕົວຢ່າງຂອງຄຳຮ້ອງຂໍທຶນຊ່ວຍເຫຼືອຂະໜາດນ້ອຍ
- ເຮັດສັນຍາກັບຜູ້ຂຽນຂໍທຶນ ເພື່ອຊ່ວຍອົງການຂອງທ່ານໃນການສະໝັກຂໍທຶນຊ່ວຍເຫຼືອທີ່ກ່ຽວພັນກັບບັນຫາການປ່ຽນແປງສະພາບດິນຟ້າອາກາດ
- ຊື້ຕົ້ນໄມ້, ດິນ, ແລະປຸ໋ຍ ສຳລັບໂຄງການປັບປຸງສວນໃນຊຸມຊົນ
- ຈ່າຍຄ່າຜູ້ຮັບເໝົາໃນການດຳເນີນການກວດສອບການໃຊ້ພະລັງງານໃນອາຄານຂອງທ່ານ
- ສົ່ງພະນັກງານໄປຮັບການຝຶກອົບຮົມ ເພື່ອຮຽນຮູ້ກ່ຽວກັບພະລັງງານສະອາດ
- ຈ່າຍຄ່າຈ້າງໃຫ້ແກ່ພະນັກງານ ເພື່ອໃຫ້ຈັດງານກິດຈະກຳພາຍນອກທີ່ກ່ຽວພັນກັບການປ່ຽນແປງສະພາບດິນຟ້າອາກາດ
ຂັ້ນຕອນການຄັດເລືອກ
ອົງກອນທຸກຂະໜາດແມ່ນມີສິດທີ່ຈະສະໝັກ. ຂັ້ນຕອນການຄັດເລືອກຈະໃຫ້ຄວາມສຳຄັນກັບອົງການຂະໜາດນ້ອຍກ່ອນ (ອົງການທີ່ມີພະນັກງານເຮັດວຽກເຕັມເວລາ ໃນຮອບໜຶ່ງປີຈຳນວນສາມຄົນ ຫຼືໜ້ອຍກວ່ານັ້ນ) ຊຶ່ງມາຈາກ ແລະຮັບໃຊ້ ຊຸມຊົນຜູ້ມີສິດພິເສດສຳລັບ PCEF. ໃນແຕ່ລະໄຕມາດ, ເຈົ້າໜ້າທີ່ຈະກວດກາຄືນບັນດາໃບສະໝັກຕ່າງໆ ເພື່ອພິຈາລະນາວ່າ ເຂົາເຈົ້າມີສິດທີ່ຈະໄດ້ຮັບທຶນຊ່ວຍເຫຼືອ ຫຼືບໍ່ ຖ້າວ່າ ເຂົາເຈົ້າມີສິດເໝາະສົມ, ຜູ້ສະໝັກນັ້ນກໍຈະຖືກຈັດໃຫ້ຢູ່ໃນກຸ່ມທີ່ມີສິດພິເສດ ໂດຍອີງຕາມຂະໜາດຂອງອົງການຂອງເຂົາເຈົ້າ, ບໍ່ວ່າ ເຂົາເຈົ້າຈະມາຈາກ ແລະນຳພາໂດຍກຸ່ມຄົນທີ່ມີສິດພິເສດສຳລັບ PCEF ຫຼືບໍ່ກໍຕາມ, ແລະບໍ່ວ່າ ເຂົາເຈົ້າຈະໄດ້ຮັບທຶນຊ່ວຍເຫຼືອຂະໜາດນ້ອຍມາກ່ອນແລ້ວໃນປີກ່ອນໜ້ານັ້ນກໍຕາມ.
ຖ້າວ່າ ຍອດລວມຂອງທຶນທີ່ຂໍໃນໜຶ່ງໄຕມາດນັ້ນ ມີຈຳນວນຫຼາຍກວ່າ $100,000 ທີ່ມີຢູ່, ເຈົ້າໜ້າທີ່ຈະເລືອກຜູ້ສະໝັກໂດຍນຳໃຊ້ລະບົບການຄັດເລືອກແບບສຸ່ມ ພາຍໃນກຸ່ມທີ່ມີສິດພິເສດນັ້ນ ເພື່ອຫຼີກລ່ຽງບັນຫາການໄດ້ປະໂຫຍດທີ່ບໍ່ເທົ່າທຽມກັນຂອງລະບົບ “ໃຜມາກ່ອນ, ໄດ້ກ່ອນ”
ອ່ານຂໍ້ມູນລະອຽດຕື່ມ ກ່ຽວກັບຂັ້ນຕອນການຄັດເລືອກສຳລັບທຶນ Mini Grants
ຂໍ້ກຳນົດວ່າດ້ວຍຂໍ້ຕົກລົງ
ຂໍ້ກຳນົດວ່າດ້ວຍການຈ່າຍເງິນ
- ຄວາມຍາວຂອງຂໍ້ຕົກລົງສຳລັບທຶນໜຶ່ງປີ
- ທາງເລືອກການຈ່າຍເງິນ ມີສອງທາງເລືອກ: ການຈ່າຍເງິນກ້ອນເຕັມຈຳນວນລ່ວງໜ້າ ຫຼື ການຈ່າຍເງິນຄືນໃຫ້ເຕັມຈຳນວນ
ຂໍ້ກຳນົດດ້ານການລາຍງານ
- ສັງລວມບັນຍາຍແບບງ່າຍໜຶ່ງໜ້າ ສຳລັບລາຍງານທາງການເງິນ, ແລະໃບຮັບເງິນ/ໃບສົ່ງສິນຄ້າ.
- ສັງລວມທາງການເງິນ ແລະໃບຮັບເງິນ/ໃບສົ່ງສິນຄ້າ ຕ້ອງສະແດງຫຼັກຖານການຈ່າຍເງິນດ້ວຍ.
- ພວກເຮົາສາມາດຍອມຮັບຮູບແບບການລາຍງານຫຼາຍຮູບແບບ (ຮູບແບບການຂຽນ, ວີດີໂອ, ອອດີໂອ, ເປັນຕົ້ນ) ແລະພາສາຕ່າງໆ. ເຈົ້າໜ້າທີ່ຂອງ PCEF ສາມາດປະສານງານດ້ານການແປພາສາ ຖ້າວ່າຈຳເປັນ.
ຮຽນຮູ້ຕື່ມກ່ຽວກັບການລາຍງານ ແລະມາດຕະການໃນການກວດສອບສຳລັບທຶນ Mini Grants.
ຂໍ້ກຳນົດດ້ານປະກັນໄພ
- ເຈົ້າໜ້າທີ່ຈະແຈ້ງໃຫ້ຜູ້ຮັບທຶນຮູ້ກ່ຽວກັບລະດັບການປະກັນໄພທີ່ຕ້ອງການ. ຂໍ້ກຳນົດດ້ານປະກັນໄພແຕກຕ່າງກັນໄປ ຂຶ້ນຢູ່ກັບວ່າ ຈະໃຊ້ເງິນທຶນແນວໃດ.
- ກິດຈະກຳບາງປະເພດ ແລະການນຳໃຊ້ເງິນທຶນບາງຢ່າງ ອາດໝາຍເຖິງ ການມີຂໍ້ກຳນົດດ້ານປະກັນໄພໜ້ອຍລົງ ຫຼື ບໍ່ມີເລີຍ.
- ວຽກທີ່ໄດ້ຮັບທຶນຊ່ວຍເຫຼືອ ຊຶ່ງລວມເຖິງ ກິດຈະກຳສາທາລະນະ ຫຼື ການເຮັດວຽກໂດຍກົງກັບສະມາຊິກໃນຊຸມຊົນ ຈະມີລະດັບການປະກັນໄພສູງທີ່ສຸດ.
ເປັນຫຍັງຈຶ່ງຕ້ອງມີການປະກັນໄພສຳລັບທຶນຊ່ວຍເຫຼືອ?
ຄຳຖາມເພີ່ມເຕີມ
ມີຄຳຖາມເພີ່ມອີກບໍ່ ຫຼື ກຳລັງຊອກຫາລາຍລະອຽດຕື່ມອີກບໍ່?
- ເຂົ້າຮ່ວມກັບພວກເຮົາສຳລັບການປະຊຸມທາງອອນລາຍເພື່ອຮັບຟັງຂໍ້ມູນກ່ຽວກັບທຶນ Mini Grants ຫຼື ຊົ່ວໂມງຊ່ວຍເຫຼືອ.
- ເບິ່ງໜ້າ ຄຳຖາມທີ່ຖາມເລື້ອຍໆ ກ່ຽວກັບທຶນ PCEF Mini Grants ເພື່ອໃຫ້ຮູ້ຄຳຕອບຂອງທ່ານ
- PCEFminigrants@portlandoregon.gov
ວິທີການສະໝັກ
ກ່ອນປະກອບໃບສະໝັກຂໍທຶນຊ່ວຍເຫຼືອຂະໜາດນ້ອຍ, ກະລຸນາອ່ານຄຳແນະນຳ, ຂໍ້ກຳນົດດ້ານຄຸນສົມບັດ, ກຳນົດວັນສຸດທ້າຍ, ແລະລາຍລະອຽດສຳຄັນອື່ນໆ ເພື່ອໃຫ້ໝັ້ນໃຈວ່າ ທ່ານເຂົ້າໃຈຈຸດປະສົງແລະຄວາມຄາດຫວັງຂອງການໃຫ້ທຶນ. ເມື່ອທ່ານອ່ານລາຍລະອຽດໂຄງການແລ້ວ, ເບິ່ງທີ່ໜ້າ ການສະໝັກຂໍທຶນ Mini Grant ເພື່ອເບິ່ງ ແລະປະກອບຂໍ້ມູນໃສ່ໃບສະໝັກ.